21^e juillet 1670, no 882

Monsieur d’Argouges, premier président

Monsieur Barrin, rapporteur

Entre le procureur general du roy, demandeur, d’une part.

Et Pierre Denys, escuyer, sieur de Lesmel, demeurant en sa maison de Lesmel, parroisse de Plouquerrault, evesché de Leon, ressort de Lesneven, deffandeur, d’autre part [1].

Veu par la Chambre establye par le roy pour la refformation de la noblesse du pays et duché de Bretagne, par lettres patentes de Sa Majesté du moys de janvier 1668, veriffiées en parlement le 30^e juin ensuyvant.

Un extraict de presentation faicte au greffe d’icelle par maitre René Berthou, procureur dudict deffandeur, le 5^e d’aoust 1669, lequel auroit pour luy declaré soustenir la quallité d’escuier et de noble d’antienne extraction et avoir pour armes d’argeant à une quinte feille de gueulle [2].

Induction dudict sieur de Lesmel, deffandeur, soubz le singn de K/gozou, procureur substitud de Berthou, principal procureur, fournye et signiffiée au procureur general du roy, le 9^e de may 1670, par Testart, huissier en la Cour, par laquelle il declare estre noble et issu d’antienne extraction noble et comme tel debvoir estre et ses dessendans en legitime mariage maintenus en la quallité d’escuyer, pour jouir de tous les droicts, honneurs, franchises, privilleges et preeminances attribuez aux nobles de cette province, et en consequence que son nom sera employé au roolle et cathologue des nobles de la juridiction royalle de Lesneven.

D’argent à une quintefeuille de gueules.

Pour establir la justice desquelles conclusions, le deffandeur articulle à faicts de genealogye qu’il est fils aisné, heritier principal et noble de nobles homs Goulven Denys et de dame Janne de Coatanscoure, ses pere et mere, lequel Goulven estoit fils unicque de noble escuyer Yves Denys, vivant sieur de Lesmel, et de damoiselle Yzabeau Morice, et que ledit Yves Denys estoit fils aisné, heritier principal et noble d’escuyer Jan Denys et de damoiselle Catherine Le Ros, et que ledit Jan, son bizayeul, estoit fils aisné, heritier principal et noble d’Yvon Denys et d’Anne Marec, et que ledit Yvon estoit pareillement fils aisné, heritier principal et noble d’autre Yvon Denys, escuyer, sieur de Poulhalec, et de damoiselle Catherine de Quenquis, ledit Yvon, marié avecq ladite de Quenquis estoit fils juveigneur de Tanguy Denys et de Marguerite Dourdu, tous lesquels, comme leurs predecesseurs, se sont de tout tempts immemorial gouvernés et comportés noblement et adventageussement, tant en leurs personnes, biens que partages, et ont [folio 1v] tousjours pris et porté les quallités de nobles escuiers et seigneurs.

Ce que pour justiffier, ledict deffandeur met troys actes.

La premiere est un partage noble et adventageux donné par messire Alexandre de Coatanscourre, seigneur dudit lieu, conseiller du roy en son parlement de Bretagne, à damoiselle Janne de Couatanscoure, compaigne de nobles homs Goulven Denys, sieur et dame de Lesmel, aux successions des deffuncts seigneur et dame de Coatanscourre, leurs pere et mere communs, ledit acte de partage datté du 18^e mars 1647.

Un extraict de l’aage du deffandeur, fils legitime de nobles homs Goulven Denys et de dame Janne de Coatanscourre, seigneur et dame de Lesmel, ledict extraict tiré de sur le papier baptismal de l’eglise parrochialle de Ploukerneau, datté du 20^e may 1643, et au delivré aussy datté du 15^e juin 1669, et icelluy compulcé devant le seneschal de la jurisdiction du Chastel, à Lannily.

Un contract de mariage passé entre nobles homs Jan du Poulpry, sieur de K/illas, fils juvigneur de messire Guillaume du Poulpry, seigneur de Lanvengat, avecq damoiselle Marguerite Denys, fille aisnée de nobles homs Goulven Denys, sieur de Lesmel, de son premier mariage avecq damoiselle Marye de Pontplancoet, en son vivant dame dudit lieu de Lesmel, fille de nobles homs Guillaume Pontplancoet, sieur de K/gazquen, de son mariage avecq feue damoiselle Marguerite Lesguen, dame dudict lieu de K/gazquen, ledit contract datté du 8^e decembre 1652.

Acte d’institution à la provission de noble Goulven Denys, aagé de 7 ans, mineur de deffunct noble Yves Denys et de damoiselle Ysabeau Morice, sa veuffve, faict par la jurisdiction royalle de Lesneven, par lequel, après plussieurs voix tant paternels que maternels dudit mineur, se quallifiant nobles homs, escuyers et seigneurs, par lequel acte ladite Morice auroit esté créée et instituée à tutrixe et curatrixe de son fils mineur, ledit acte datté du 9^e de mars 1621.

Autre exploict judiciel faict devant le bailliff de la jurisdiction du Chastel, à Lannilis, presant le procureur fiscal en icelle, entre escuyer Pierre Le Roy, sieur de Measgestin, curatteur d’escuyer Goulven Dennis, sieur de Lesmeul, fils unicque et seul heritier de feuz escuyer Yves Denis et damoiselle Ysabelle Morice, vivants ses pere et mere, sieur et dame de Lesmeul, par lequel, après l’advis de quantité des parants dudit sieur de [Le]smeul, auroit esté nobles homs Guillaume de Poulplancoet, seigneur de K/gazquen, le consentant en la charge de curatteur particullier honoraire dudit sieur de Lesmeul, ledit acte datté du 30^e may 1635.

Sept pieces. La premiere est des lettres obtenues en la Chancellerye [folio 2] par escuyer Yves Denys, ayeul du deffandeur, qui proeuve que Lucresse Mazeas, fille unicque de Henry, qui ne s’estoit point mariée et fort aagée, et Yves Denis, comme son presomptiff heritier collateral, pour informer de sa parenté avecq ladite Mazeas, aprehendant que la proeuve ne se feust divertye par la mort des thesmoingts, lesdictes lettres dattées du 17^e decembre 1603.

Les 2 et 3^e pieces sont une requeste presantée par escuyer [Yves] Denys, sieur de Costiglastrin, au lieutenant dudit Lesneven, et ordonnance d’assigner les thesmoingts, des 5^e janvier et 22^e juillet 1604.

Une enqueste faicte à requeste dudit escuyer Yves Denys, où il se justiffie qu’il estoit fils aisné heritier principal et noble d’escuyer Jan Denys et de damoiselle Catherine Le Ros, et qu’il estoit fondé à succeder à ladite damoiselle Lucresse Mazeas, dame de Lesmel, par representation de sa mere, dudit jour 22^e juillet 1604.

Une assiette de reste de partage donné par damoiselle Lucresse Mazeas, dame du Lesmel, à nobles homs Yves Denys et damoiselle Yzabeau Morice, sa compagne, sieur et dame de Gouasletran, et promis par nobles homs Henry Mazeas, vivant sieur de Lesmeul, à damoiselle Marguerite Mazeas, bizaieulle dudit Yves Denis, datté du 10^e aoust 1617.

Un acte de baillée de cauption donnée par damoiselle Yzabelle Morice, comme curatrixe de son fils, en consequence de la sentence de main levée luy adjugée de la succession de damoiselle Lucresse Mazeas, datté du 30^e mars 1621.

Un adveu et declaration des herittages tombés en rachapt par le deceix de damoiselle Lucresse Mazeas, vivante dame de Lesmel, fourny par nobles homs Goulven Denys, seigneur dudit lieu de Lesmel, Goueletran, son seul et unicque heritier, datté du 22^e octobre 1636.

Une demission faicte par ladite Marec aux mains dudit Jan et Gabriel Denys, ses enffents de son mariage avecq Yvon Denys, par laquelle demission, outre la filliation qui s’y trouve justiffiée, les quallités nobles et gouvernement adventageux [folio 2v] recogneus, ayant par icelle ledit Jan, en quallité de fils aisné heritier principal et noble, partagé ledit Gabriel, son frere juveigneur, ledict acte de dimission et partage du 10^e janvier 1576.

Un contract de mariage passé entre noble escuyer Yvon Denys avecq damoiselle Catherine du Quenquis, fille aisnée de noble homme François du Quenquis, sieur du Vignier, datté du 16^e septembre 1533.

Un contract de vente faicte par noble Yvon Denys, sieur de Poulhalec, à noble messire Gabriel de K/sainctgilly, sieur de K/enez, du 14^e janvier 1561.

Une transaction passée entre Yvon Denys, comme garde naturel d’autre Yvon Denys, son fils de son mariage avecq ladite Catherine Quenquis, et Magdelainne Coetivy, tutrixe de François du Quenquis son fils, touchant le partage deub audict Yvon Denis mineur, par representation de sa mere, datté du 28^e octobre 1548.

Acte de demission faicte par Tanguy Denys entre les mains de Guillaume Denys, son fils aisné, heritier principal et noble, presomptiff, Yvon et Henry Denys, aussy ses enffents et freres juveigneurs dudit Yvon, lequel Guillaume cognoit avoir receu lesdits Yvon et Henry, en la personne dudit Yvon, à homme de bouche et de mains, et tenir leurs droicts advenans, en noble comme en noble et en partable comme en partable, tant en la succession futture dudit Tanguy que celle [à] eschoir de ladite Dourdu, leur mere, parce que ledit Yvon audict nom, fist la foy et serment de fidelité audit Guillaume, son frere, de posseder ledict droict à ramage et seigneur, et luy fut permis de porter les armes de son pere, avecq le lambeau, comme fils juveigneur de noble homs, ce qui faict une proeuve de l’antiquité dudit Tanguy et ses predecesseurs et que ils avoient juré l’assise, ledit acte datté du 16^e may 1499.

Un partage noble et adventageux donné par noble Tanguy Denys, comme fils aisné heritier principal et noble de Guillaume Denys et de Marguerite de Chasteaufur ses pere et mere, à Françoise Denys sa sœur, aux successions de leurs pere et mere communs, qui sont recogneus nobles, ledit acte datté du 14^e octobre 1511.

Autre partage noble et adventageux donné par le mesme Tanguy Denys, en ladite quallité de fils aisné heritier principal et noble de Guillaume, qu’il estoit pareillement dudit Tanguy, premier du nom, à [folio 3] Anne Denys sa sœur, aux successions de leurs pere aieuls communs, ledit partage datté du 10^e may 1523.

Un extraict tiré des registres de la chambre des comptes de Bretagne, ou y est employé en la refformation des nobles de l’evesché de Leon en l’an 1443, soubz la parroisse de Sainct Goeznou, et raporté au 2^e rang des nobles, Allain fils Ollivier Denys, mineur, et soubz la parroisse de Ploelkerneau, au 9^e rang y est raporté Tanguy Denys, et dans la refformation du mesme evesché de l’an 1536, y est employé le manoir et maison de Lancelin et deux mestairyes, des appartenances et adjacentes ledit manoir, apartenant à Tanguy Denys gentilhomme, lequel Tanguy employé en la refformation de ladite annee 1536, estoit, ainsy qu’il est proeuvé en icelle, sieur de Lancelin, aussy bien qu’avoient esté Guillaume Denys, son pere, et Tanguy Denys, son ayeul, quintayeul du deffendeur, ledict extraict datté au delivré du 3^e septembre 1669.

Contredicts du procureur general du Roy, signiffié au procureur du deffandeur, le 17^e de may 1670, par Davy, huissier en la cour.

Requeste dudit sieur de Lesmel, signiffiée et actes y certés et mentionnés, monstrés au procureur general du roy et mis au sacq par ordonnance de ladicte chambre du 14^e du present moys de juillet 1670.

Responses fourniz ausdicts contredicts par ledit deffandeur, signiffié au procureur general du roy ledit jour 14^e dudict moys de juillet audict an 1670, par Dutacq, huissier en ladite cour.

Et tout ce que par icelluy deffandeur a esté mis et produict devers ladicte chambre, au desir de son induction et actes y mentionnés, que par autres actes aussy certés et dattés en sa requeste, par tous lesquels les quallités de nobles homs, escuyers et seigneurs y sont raportés, consideré.

Il sera dict que la Chambre, faisant droict sur l’instance, a declaré et declare ledict Pierre Denys noble et issu d’antienne extraction noble, et comme tel luy a permis et à ses dessendans en mariage legitime de prendre la quallité d’escuyer et l’a maintenu au droict d’avoir armes et escussons timbrées appartenants à sa quallité et à jouir de tous droicts, franchises, preeminances et previllages attribués aux nobles de cette [folio 3v] province et ordonné que son nom sera employé au roolle et cathologue des nobles de la juridiction royalle de Lesneven.

Faict en ladicte Chambre, à Rennes, le 21^e juillet 1670.

[Signé] d’Argouges, Barrin.

[folio 4]

Monsieur de la Bourdonnais, rapporteur.

Veu l‘induction des actes et tiltres de Louis Denis, sieur de Pratamont et consors y desnomés, les actes et tiltres y employés, je consens pour le roy lesdicts Denis estre maintennus en la qualité d’escuiers et comme tels mis au rolle des nobles de la jurisdiction de Lanion.

Fait au parquet le quatriesme may 1669.

[Signé] André Huart.