Monsieur d’Argouges, premier president

Monsieur Lefeuvre, rapporteur

du 18^e janvier 1669, n. 494

Entre le procureur general du roy demandeur, d’une part,

Et René Durand, escuier, sieur de la Miniere, et Claude Durand, escuier, sieur de Launay, deffendeurs, d’aultre part [1].

Veu par la chambre establye par le roy pour la refformation de la noblesse du pays et duché de Bretaigne, par lettres patantes de Sa Majesté du mois de janvier 1668, veriffiées en parlement, deux extraicts de comparutions faictes par lesdits deffendeurs au greffe d’icelle les 2 et 25^e octobre 1668, contenant leurs declarations de vouloir soustenir la qualité d’escuier par eux et leurs predecesseurs prinse, aux fins des tiltres qu’ils produiront, avec l’escusson de leurs armes.

Induction d’actes desdits deffendeurs fournyes audit procureur general du roy les 30^e decembre 1668 et et 2^e janvier 1669, tendantes, sçavoir celle dudit René Durand à ce qu’il soit, entre aultres choses, maintenu en la qualité de chevalier et celle dudit Claude Durand à estre aussi maintenu en la qualité d’escuier, et à porter pour armes, d’argent à neuff lozanges de sable, pour jouir des privileges comme les aultres gentilzhommes de la province, et qu’à cet effect, ils seront mis et inscripts au catologue des nobles du resort du presidial de Nantes et de Rennes.

Conclusions dudit procureur general du roy et tout ce que devers ladite Chambre a esté mis et induict par lesdits deffendeurs, aux fins de leursdites inductions, meus et consideré.

D’argent à neuf losanges de sable.

Il sera dit que la Chambre, faisant droict sur l’instance, a declaré et declare lesdits René et Claude Durand, noble et issus d’antienne extraction noble, et comme tels leur a permis et à leurs dessandants en mariage legitime de prendre la qualité d’escuier, et les a maintenus aux droicts d’avoir armes et escussons timbrez apartenants à leur qualité et à jouir de tous droicts, franchises, exemptions, immunitez, preminances et privileges attribuez aux nobles de cette province, ordonne que leurs noms seront emploiés au rolle et

[folio 1v]

catologue des nobles, sçavoir celuy dudit René Durand en la senechaussée de Nantes et celuy dudit Claude Durand en la senechaussée de Rennes.

Faict en ladite Chambre à Rennes, le 18 janvier 1669.

[Signé] d’Argouges, Lefeuvre.